槍打出頭鳥
今天本來想寫「聞聊 - 沉迷」﹐因為這排沈迷 GTA 5﹐對沉迷又有一番新見解。
但昨天我和好多香港人一樣對政府唯獨不發新免費電視牌照給香港電視網絡 (HKTV) 感到非常震驚。HKTV 獲得牌照的呼聲一直最高。老實說﹐我沒有睇過佢早前放上網嘅電視劇﹐但也知道坊間反應不俗﹐香港人有合理期望它將成為其中一間新免費電視台。
昨天政府宣布行政會議決定只發兩個新牌給有線的奇妙電視及電訊盈科的香港電視娛樂﹐不發牌給王維基的香港電視網絡﹐政府還指出這個決定的原因是秘密。
香港人﹐你能接受嗎？
我不能接受的原因不是那個電視台不獲發牌會感到很失望（原本就無期望過）﹐而是此次事件令我真的覺得 "This city is dying you know"﹐唔批唔緊要﹐總要給個理由﹐政府連一個可以放上枱面的理由都無呀！你話幾咁黑喑呢！這裏真的是我一直生活的香港嗎？
今天卡片局長仲話佢地輸無經驗。我吥！Now 和有線做的是收費電視﹐他們那裏有做免費電視的經驗？想睇 Now 和有線節目的觀眾已經俾錢睇緊﹐質素如何大家心中有數（謎之音：唔係有波睇﹐鬼有人申請咩。）﹐佢地食住花生都可以無端端得到個牌﹐之後可以搞 D 乜野出來﹐難道香港人會有得免費睇英超咩？
反而人地買晒架生﹐請晒人﹐起晒樓﹐"We are ready" 咁等你個牌﹐你一句呢 D 係你自己攞嚟賤﹐無人叫你咁做喎﹐你一廂情願之嘛。係呀！對於一些還認為政府點衰睇電視咁少事都應該會聽民意的市民﹐你地一廂情願之嘛﹐你地都係返去睇乜姐落雞汁啦！（哈哈哈哈）
如果一開始就覺得人地唔掂﹐當初做乜批塊地俾人起電視台呢？香港係奉行市場主義﹐如果佢做唔掂﹐市場自然會淘汰佢地﹐正如當初的收費電視頻道一樣。
現在政府嘅一次黑箱作業﹐令投資者及其公司死得不明不白﹐這絕對會嚇怕外來投資者﹐日後你政府有甚麼鴻圖大計想要投資者先作前期投資﹐除了政府裏面有人的公司﹐那有投資者再敢投資呢？那麼投資者在上海或香港投資都無乜分別啦！
香港政府現在是幫手削弱緊香港的競爭力呀！
網上有膠論指無理由發牌俾 HKTV 就係「公義」﹐不發給它就是「唔公義」﹐此論者根本不明事件的焦點。香港人感到憤怒﹐除了因為期望落空﹐另外政府沒有給出一個合理解釋也是主因。
香港凡事講「程序」講「制度」﹐那怕是最官僚的部門﹐只要做足準備﹐交足文件﹐跟足程序最終都可以過關﹐絕不會出現那個公務員不高興就可以說「不」的人治情況。
今天有那個香港人不知道是中央不發牌給王維基﹐但難道香港的特首和局長可以在電視上明言嗎？幸好還不可以﹐但將來......
畢竟今次政府已將甚麼「獅子山下精神」和「機會係留俾有準備的人」等言論全部打沉了。
不如改做「順我者生、逆我者亡」算吧啦！
今天香港已死﹐我的心情很沈重。
